【新闻】名店興奮試波鞋 蓋鳴暉鍾意又閃又花款式

　　粵劇名伶蓋鳴暉近年積極推廣粵劇文化及參與籌款善舉，但Shopping係人都鍾意，幾忙都會抽到時間去買嘢。早前蓋鳴暉偕好友到銅鑼灣睇鞋，主攻易襯又潮的名牌波鞋。她先行Hermes專門店，試咗幾對似乎唔太啱心水，於是再轉戰Miu Miu，一試停唔到，見她試了大半個鐘，最後買了一對波鞋，滿足地離開。採訪：梁志明
　　蓋鳴暉明年就入行30年，問她可會舉辦慶祝活動時，她坦言：「咁一定會舉辦粵劇，都諗緊會唔會搞演唱會，想搞個新穎啲，可能會中西合璧。」蓋鳴暉演出喜歡搞搞新意思，打扮上一樣愛新潮。因為蓋鳴暉不用開工時，鍾意以smart casual造型示人，後生啲，人都精神啲。
　　早前她與幾位女友人去銅鑼灣行街，她們先到利園的Hermes睇波鞋，款式唔多，但佢都有揀咗幾對試，其間顯得好雀躍，不時問友人意見。逗留了約半個鐘，試唔啱就轉場，再行去Sogo的Miu Miu睇過，簡單巡一個圈就睇啱心水。只見店員不斷拿不同款式的波鞋給她試，有閃石的，也有colourful圖案的，試完一對又一對，似乎對對都好鍾意。試咗大半個鐘，見她深思熟慮諗咗一陣，最後入手一對近六千蚊的波鞋，總算冇空手而回。